पावसाच्या सरी..

पावसाच्या सरी तशा येती हाका

कसे येऊ नका म्हणायचे..?

पानांचे तोरण

पानांचे तोरण पानांची रांगोळी

घळ सजलेली केंव्हाचीच..!

निर्गुणास वाटे

निर्गुणास वाटे ल्यावे रूप-गूण

फुटे पानातून ब्रह्मकळी..!

प्रतिबिंबामध्ये..

प्रतिबिंबामध्ये फक्त बिंबाकृती

नाद गंध गती स्व-रूपात..!

आज आशा आहे..

आज आशा आहे येईल पाऊस

होईल उरूस सृजनाचा..!

देखणे आकाश

देखणे आकाश भरारी देखणी

वेरूळची लेणी आठवली..!

तरंग-लावण्य..

तरंग-लावण्य बाहतेय पण

मुळांचे पैंजण रोखतात..!

गतीला रोखण्या..

गतीला रोखण्या नाही कुणी वाली

आपणच झाली लाल दिवा..!

रंग रूप गंध...

रंग रूप गंध टच्च भरलेत

उत्कंठा देठात फुलण्याची..!

तमाचे साम्राज्य..

तमाचे साम्राज्य सृष्टीला व्यापून

प्रकाशाची खूण चंद्रापाशी..!

कोणाचे नेपथ्य..

कोणाचे नेपथ्य कोण करविता

रंगमंच रिता टाळ्या घेई..!

असीमाला सीमा

असीमाला सीमा मान्य नाही त्याला

ओलांडून गेला क्षणार्धात..!

तुरा नि पिसारा

तुरा नि पिसारा सारे सजलेत

साळुंकी तंद्रीत विसावली..!

ईशावास्य सारे..

ईशावास्य सारे हे जे आहे ते ते

रोज प्रकटते मावळून..!

सानुलेसे रोप..

सानुलेसे रोप खेळ निरखत

निश्चिंत कवेत विराटाच्या..!

खोल गर्भातला

खोल गर्भातला ओलेता अंधार

हिरवा गंधार आळवतो..!

केशरी उजेड..

केशरी उजेड पाणीही केशरी

प्रतिबिंबाघरी आले बिंब..!

छोटे छिद्र होते

छोटे छिद्र होते आता हे विवर

शून्याचा आकार मोठा फक्त..!

झाडाच्या सवेच

झाडाच्या सवेच नृत्य उगवते

आकारास येते काष्ठशिल्प..!

निसर्गाची भाषा..

निसर्गाची भाषा मूक प्रत्ययांची

डौलदार तिची चित्रलिपी..!

अलगद असे..

अलगद असे झेलले फुलाला

जसे की बाळाला खेळवावे..!

असण्याचे भान..

असण्याचे भान विणते तोरण

करते अर्पण ज्याचे त्याला..!

कुंडी प्रसवली..

कुंडी प्रसवली जन्मले उद्यान

चौकटींचे भान साहवेना..!

काही न सांगता..

काही न सांगता कुठूनसे आले

व्दारपाल झाले क्षणभर..!

भूत भविष्याचा..

भूत भविष्याचा नाही ऐल-पैल

अथांग केवळ वर्तमान..!

पंख हवे दोन..

पंख हवे दोन नकोत पायर्‍या

भरारी घ्यावया आकाशात..!

वेगळ्या स्वरात..

वेगळ्या स्वरात गाणी कशी गावी

कशी बदलावी पार्श्वभूमी..?

सांगतच राही..

सांगतच राही निसर्ग रंगून

घ्यायचे टिपून किती काय..?

कापून टाकती..

कापून टाकती त्यांना हवे तसे

मुळांना हवेसे येते वर..!

मुक्त गातो आहे..

मुक्त गातो आहे निसर्गाचा भाट

दिवाळी पहाट आषाढात..!

एकलेच बिंब

एकलेच बिंब बघे भोवताली

प्रतिबिंब खाली वाट पाहे..!

तरंग वरती..

तरंग वरती खोलात काहूर

सुटतोच धीर पाण्याचाही..!