पक्षी आडोशाला..

पक्षी आडोशाला दृश्य दिसेनासे

पाऊस उसासे धुवांधार..!

कोणतीही फट..

कोणतीही फट उगवाया पुरे

आकांताचे झरे आत जर..!

तोर्‍यात उभा हा..

तोर्‍यात उभा हा इवलासा तुरा

करतो मुजरा आकाशाला..!

ओघळले नेत्र..

ओघळले नेत्र पाना-फुलांचेही

पर्जन्याची ग्वाही मिळताच..!

वेगळाच स्नेह..

वेगळाच स्नेह झाडांशी वेलींचा

हार अस्तित्वाचा समर्पिती..!

अप्राप्य आकाश..

अप्राप्य आकाश रस्त्यावर आले

किती दीन केले त्याला आम्ही..!

बाळवडालाही..

बाळवडालाही सोडले न त्यांनी

विद्रोह पानांनी केला तरी..!

कसा मी कोरडा..

कसा मी कोरडा राहिलो अजून

पाण्यात असून कैक युगे..!

चित्र-विचित्रांचा..

चित्र-विचित्रांचा खेळ जागोजाग

निसर्गाची बाग अनुपम्य..!

कशाकशाचा हा..

कशाकशाचा हा विळखा पडला

आता सुटकेला वाव नाही..!

धरणीचा भार

धरणीचा भार । करावया कमी

बुंधा होई भूमी । आपसुखे..!

पाण्याचीच नाव..

पाण्याचीच नाव पाण्याचीच वल्ही

डौलात निघाली पाण्यासवे..!

एकत्र नांदती

एकत्र नांदती भक्ष्य नि भक्षक

निसर्ग रक्षक दोघांचाही..!

कैलाशपती की..

कैलाशपती की वधू सजलेली

लाल वेषातली वृक्षकन्या?

सोडावा की नको..

सोडावा की नको एकांताचा डोह

बाहेरचा मोह भिववितो..!

नजर न लागो

नजर न लागो । ध्यानस्थ सुखाला

शब्द थबकला । नजरेत..!